सिरहा, औरही गाउँपालिकाका अध्यक्ष शिवजी यादव पक्राउपछि डोम परिवार विस्थापित भएको छ।
अध्यक्षका आफन्त र समर्थकले धम्की र गालीगलोज गरेपछि दीपक मरिक डोमको परिवार शुक्रबार रातिदेखि विस्थापित भएको हो।
विष्णु महायज्ञको नाममा गत फागुन १० गते औरही गाउँपालिका ५ मा रहेको दीपकको घर डोजर लगाएर भत्काइएको थियो।
घटना सार्वजनिक भएपछि संलग्न गाउँपालिका अध्यक्ष शिवजी यादव र वडा नम्बर ५ का वडाध्यक्ष दिलीप यादवलाई प्रहरीले शुक्रबार साँझ पक्राउ गरेको थियो।
अध्यक्ष यादव पक्राउ परेपछि उनका छोरासहित स्थानीयले दीपकको घरमा पुगेर गालीगलोज र धम्की दिएका थिए।
त्यसपछि दीपक र उनकी श्रीमती अनिता वडा नम्बर ४ कोमलपुरमा रहेको दलित आयोगका पूर्वसदस्य कवुली पासवानको घरमा शरण लिएका छन्।
उनीहरूका छोराछोरीहरूले भने औरही प्रहरी चौकीमा रात बिताएका छन्।
‘साँझ पालिका अध्यक्ष शिवजी यादव पक्राउ परेपछि उहाँका छोरा रुकेशले केही महिलाहरूसहित आएर धाकधम्की र गालीगलोज गरे।
मेरी श्रीमती अनितालाई हिँड्न दबाब दिए।’ दीपकले भने, असुरक्षित महसुस भएपछि अनिता कवुली काकाको घरमा आइन्।
म पनि यतै बसेको छु। मेरा बालबच्चाले औरही प्रहरी चौकीमा रात बिताए।’