काठमाण्डू, महिला त्रिकोणात्मक टी–२० क्रिकेट सिरिजको अन्तिम खेलमा पनि नेपाल पराजित भएको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा शुक्रबार भएको खेलमा नेपाल थाइल्याण्डसँग ७ विकेटले पराजित भएको हो ।
सम्पूर्ण ६ खेलमा पराजित भएको नेपाल सिरिजमा अङ्कविहीन रह्यो । अन्तिम खेलमा पनि जीत हासिल गर्दै थाइल्याण्डले भने सिरिजको उपाधि जितेको छ ।
६ मध्ये ५ खेलमा जीत हासिल गरेको थाइल्याण्ड १० अङ्कसहित शीर्ष स्थानमा रहँदै उपाधि जित्न सफल भयो । ६ खेलमा ८ अङ्क जोडेको नेदरल्याण्ड्स भने सिरिजको उपविजेता बन्यो ।
आजको खेलमा नेपालले दिएको ८२ रनको लक्ष्य थाइल्याण्डले १७ ओभरमा ३ विकेटको क्षतिमा पूरा गर्यो ।
थाइल्याण्डका लागि नरुएमोल चाईवाईले अविजित २७ रन बनाइन् । नन्नापत कोनचारोएनकाईले २३ र नत्ताया बूचाथामले ११ रन बनाइन् ।
नेपालका लागि कप्तान इन्दु बर्माले दुई विकेट लिइन् । यसअघि टस जितेर ब्याटिङ रोजेको नेपालले पूरै २० ओभर खेलेर ७ विकेटको क्षतिमा ८१ रन बनाएको थियो ।
नेपालका लागि सम्झना खड्काले १७ रन बनाइन् । राजमती ऐरी ११ रनमा अविजित रहिन् । कविता जोशीले १४ र कप्तान बर्माले १० रन बनाइन् ।
थाइल्याण्डका लागि ओनिच्चा चोम्फुले ३ विकेट लिइन् ।