काठमाण्डू, नेपाली क्रिकेट टिमले महिनौंपछि जीत निकालेको छ । नेपालले पाँच महिनादेखिको हारको यात्रा तोड्दै जीत निकालेको हो ।
नेपालले पछिल्लोपटक गत ४ मेमा वेस्ट इण्डिज ‘ए’ लाई हराएको थियो । त्यसपछि भने नेपालले लगातार पराजय बेहोरिरह्यो ।
आइतबार राति टी–२० त्रिकोणात्मक सिरिजमा भने नेपालले ओमानलाई ३७ रनले हराउँदै लयमा फर्किएको संकेत दिएको छ ।
ओमानसँगको खेलमा टस हारेर ब्याटिङको निम्तो पाएको नेपालले निर्धारित २० ओभरमा ६ विकेट गुमाएर १ सय ७६ रन बनायो ।
नेपालका लागि युवा अलराउन्डर गुलशन कुमार झाले उत्कृष्ट इनिङ खेले । उनले १७ बलमा तीन छक्का र तीन चौकासहित अविजित ४० रनको इनिङ खेलेका हुन् ।
गुलशनले छैटौँ विकेटका लागि कुशल भुर्तेलसँग ६१ रनको साझेदारी गरे । गुलशन पछिल्लो समय उत्कृष्ट लयमा छन् ।
केही दिनअघि क्यानडामै सम्पन्न आइसीसी विश्वकप लिग–२ सिरिजमा ओमानविरुद्ध उनले अर्धशतकीय पारी खेल्नुका साथै ५ विकेट लिएका थिए ।
गुलशनले त्यो लय टी–२० सिरिजमा पनि निरन्तरता दिएका छन् । यतै, ओमानविरुद्ध कुशल मल्लले २६ बलमा दुई चौका र दुई छक्कासहित ३० रन बनाए ।
त्यस्तै, ओपनिङ ब्याटरद्वय अनिलकुमार साहले २१ बलमा तीन चौका र एक छक्कासहित २७ तथा आसिफ शेखले २२ बलमा २ छक्का र १ चौकाको मद्दतमा २७ रन नै बनाए ।
त्यस्तै, कुशल भुर्तेलले १७ बलमा एक चौका र एक छक्कासहति २० रन जोडे । नटआउट रहेका दीपेन्द्रसिंह ऐरीले ५ बलमा २ छक्का र एक चौकासहित १८ रनको आक्रामक इनिङ खेले ।
कप्तान रोहित पौडेल र देव खनाल भने दुई/दुई रनमै आउट भए । बलिङमा ओमानका लागि कप्तान अकिब इलियासले ४ ओभरमा ३२ रन दिएर सर्वाधिक तीन विकेट लिए ।
नेपालले दिएको १ सय ७७ रनको लक्ष्यका साथ जवाफी ब्याटिङमा उत्रिएको ओमान १९.१ ओभरमा १ सय ३९ रनमै अलआउट भयो ।
उसका लागि सोयब खानले ४५, रफिउल्लाहले ३३, फैज बटले अविजित १७, प्रतीक आठवालेले १५ र खालिद कैलले ११ रन बनाए ।
नेपालका लागि करण केसीले ४ ओभरमा ३६ रन दिएर सर्वाधिक तीन विकेट लिए । त्यस्तै, कुशल भुर्तेलले तीन ओभरमा ३२ रन दिएर २ विकेट हात पारे ।
२।१ ओभर मात्र बलिङ गरेका गुलशन झाले १४ रन दिएर २ विकेट हात पारे । अलराउन्ड प्रदर्शन गरेका उनी प्लेयर अफ द म्याच घोषित भए ।
यस्तै, रिजन ढकाल, दीपेन्द्रसिंह ऐरी र सन्दीप लामिछानेको नाममा एक/एक विकेट रह्यो । जारी श्रृंखलामा नेपालले अब मंगलबार क्यानडासँग खेल्ने तालिका छ ।