काठमाण्डू, क्यानडामा जारी आइसिसी विश्वकप लिग–२ सिरिजमा नेपालले लगातार तेस्रो हार बेहोरेको छ ।
तेस्रो पराजय बेहोर्नेक्रममा नेपाल आइतबार बिहान सम्पन्न खेलमा क्यानडासँग ५ विकेटले पराजित भयो ।
नेपाल पहिलो खेलमा क्यानडासँग नै १ सय ३ रनले पराजित भएको थियो । यस्तै, नेपाल दोस्रो खेलमा ओमानसँग एक विकेटले स्तब्ध भयो ।
जारी श्रृङ्खलाको आफ्नो तेस्रो खेलमा टस जितेर पहिला ब्याटिङ गरेको नेपाल ४६.१ ओभरमा १ सय ८१ रनमै अलआउट भयो ।
नेपालले सदाझैँ यस खेलमा पनि निकै खराब सुरुवात गर्यो । टिमले पहिलो विकेटको रूपमा ८ रन जोडेको अवस्थामा ४.२ ओभरमा आसिफ शेखलाई गुमायो । उनी व्यक्तिगत २ रनमै बोल्ड भए ।
आसिफ पछिल्लो समय निकै खराब लयमा छन् । जारी श्रृंखलामा उनी पहिलो र दोस्रो खेलमा क्रमशः २० र ११ रनमा आउट भए । आसिफले तेस्रो म्याचमा पनि ठूलो पारी खेल्न सकेनन् ।
यस्तै, तेस्रो नम्बरमा ब्याटिङ गरेका भीम सार्की पनि लयमा छैनन् । उनी तेस्रो खेलमा सातौं ओभरको अन्तिम बलमा २ रनमै आउट भए ।
भीम जारी श्रृंखलामा पहिलो र दोस्रो खेलमा क्रमशः १८ र ११ रनमा पवेलियन फर्किएका थिए । तेस्रो खेलमा भने उनले दोहोरो अंकमा समेत रन जोड्न सकेनन् ।
यस्तै, क्यानडाविरुद्ध नेपालले तेस्रो विकेट ७.५ ओभरमा अर्जुन साउदलाई व्यक्तिगत १० रनमा गुमायो । यो अवस्थामा नेपालले २० रन जोड्दा महत्वपूर्ण तीन विकेट गुमाइसकेको थियो ।
१०.२ ओभरमा कप्तान रोहितकुमार पौडेल ४ रनमा पवेलियन फर्किए । आरिफ शेख झुक्किँदा रोहित रन आउट हुँदै पवेलियन फर्किएका हुन् ।
उनी आउट भएसँगै नेपालविरुद्ध क्यानेडियन थप हावी भयो ।
साझेदारी गर्नुपर्ने अवस्थामा अनिलकुमार साह १२औँ ओभरको अन्तिम बलमा छक्का प्रहार गर्ने धुनमा एक रनमा क्याच आउट भए ।
त्यो अवस्थामा नेपालले ३६ रन बनाउँदा ५ विकेट गुमाइसकेको थियो । त्यसपछि आरिफ र गुलशन झाबीच ३४ रनको साझेदारी बन्यो ।
तर, २२.३ ओभरमा टिमले ७० रन जोडेको अवस्थामा आरिफ १० रनमा क्याच आउट भए । उनी आउट भएको केही समयपछि गुलशन पनि पवेलियन फर्किए ।
उनी २७.१ ओभरमा ३४ रनमा आउट भए । गुलशनले अघिल्लो खेलमा ५३ रनको पारी खेलेका थिए ।
यस्तै, तेस्रो खेलमा सन्दीप लामिछानेले उत्कृष्ट पारी खेले । उनले ४८ बलमा पाँच चौका र एक छक्कासहित ४९ रन बनाए ।
अन्तर्राष्ट्रिय क्रिकेटमा सन्दीपको यो करियरकै उत्कृष्ट ब्याटिङ हो । उनले सोमपाल कामीसँग ५५ रनको साझेदारी गर्दै टिमको पारी केही हदसम्म उकासे ।
सोमपाल ३८।४ ओभरमा २१ रनमा आउट हुँदा नेपाल ८ विकेट गुमाएर १४२ रन जोडेको स्थितिमा थियो ।
उनी आउट भएपछि केही समय सन्दीप र करण क्रिजमा जमे । करण र सन्दीपबीच ३९ रनको साझेदारी बन्दा नेपालले १८१ रन जोड्यो ।
यस खेलमा करणले २८ बलमा दुई चौका र एक छक्कासहित २४ रन जोडे ।
बलिङमा क्यानडाका लागि कलीम सानाले तीन, डिलन हेलिगर र हर्ष ठाकरले दुई/दुई तथा सादबिन जाफर र प्रवीण कुमारले एक/एक विकेट लिए ।
नेपालले दिएको १ सय ८२ रनको लक्ष्य क्यानडाले ४२ ओभरमा ५ विकेट गुमाएर पूरा गर्यो ।
उसका लागि नवनीद धालिवालले ८७, प्रगत सिंहले ६४, हर्ष ठाकरले १३ तथा कप्तान निकोलस किर्तनले अविजित ११ रन बनाए ।
बलिङमा सन्दीप लामिछानेले १० ओभरमा २ मेडनसहित ४२ रन दिएर सर्वाधिक २ विकेट लिए । यस्तै, करण केसी, गुलशनकुमार झा र ललितनारायाण राजवंशीले एक/एक विकेट हात पारे ।
टिमका सर्वाधिक अनुभवी बलर सोमपाल कामी भने तेस्रो खेलमा पनि विकेटविहीन रहे । उनले यस खेलमा ६ ओभरमा बिनाविकेट २६ रन दिए ।
दोस्रो खेलमा पनि सोमपाल विकेटविहीन बनेका थिए । उनले सुरुवातमा विकेट दिलाउन नसक्दा पनि नेपालले बलिङमा पनि संघर्ष गरिरहेको छ । र, त्यसको फाइदा विपक्षी टिमहरूले उठाइरहेका छन् ।
यो जीतपछि क्यानडा लिग–२ तालिकाको शीर्ष स्थानमा उक्लिएको छ । उसले ११ म्याच खेल्दा १४ अंक जोडिसकेको छ ।
नेपाल भने तालिकाको सातौं स्थानमै छ । नेपालले अहिलेसम्म सात म्याच खेल्दा ६ मा पराजय र एक खेलमा मात्र जीत दर्ता गरेको छ ।
नेपालले अब लिग–२ मा सातौं खेल मंगलबार ओमानसँग खेल्ने तालिका छ ।