वुुटवल, लुम्बिनी प्रदेशका मुख्यमन्त्री चेतनारायण आचार्यले आज विश्वासको मत लिँदैछन् ।
साउन ७ गते मुख्यमन्त्रीमा नियुक्त भएका आचार्यले आज बस्ने प्रदेशसभाको बैठकमा विश्वासको मत लिँदैछन् ।
चौथो अधिवेशनको २५ औँ बैठकमा मुख्यमन्त्री आचार्यले विश्वासको मत लिन थालेका हुन् ।
एमालेका २९ र कांग्रेसका २७ गरी ५६ प्रदेशसभा सदस्यको समर्थनमा मुख्यमन्त्रीमा नियुक्त भएका आचार्यले विश्वासको मत पाउने ढुक्क छ ।
एमाले कांग्रेसबाहेक उनलाई साना राजनीतिक दलले समेत विश्वासको मत दिने सूचना दिइसकेका छन् ।
एमाले प्रमुख सचेतक तुलसीप्रसाद चौधरीले प्रदेश सभामा रहेका बढी भन्दा बढी राजनीतिक दल र सांसदको समर्थन जुटाउने गरी तयारी रहेको बताए ।
मुख्यमन्त्री आचार्यलाई विश्वासको मत दिन सत्तारुढ दल कांग्रेस, एमालेसहित साना दलले ह्वीप जारी गरेका छन् ।
एमालेले विश्वासको मत दिन सांसदहरुलाई ह्वीप लगाएको प्रमुख सचेतक चौधरीले बताए ।
यस्तै कांग्रेस दल नेता एवं पूर्वमुख्यमन्त्री डिल्लीबहादुर चौधरीले पनि विश्वासको मतको पक्षमा मतदान गर्न उपस्थित हुन सबै सांसदलाई ह्वीप लगएका छन् ।
सरकारलाई समर्थन गरेका जनमत पाटीका दल नेता चन्द्रकेश गुप्ता, लोकतान्त्रिक समाजवादी पाटीका दल नेता सन्तोषकुमार पाण्डेयले मुख्यमन्त्री आचार्यलाई विश्वासको मत दिने र सांसदलाई हृवीप जारी गरेको जानकारी दिए ।
प्रदेशसभामा सहभागी ११ वटा राजनीतिक दलमध्ये जसपा २, जसपा नेपाल १ र नागरिक उन्मुक्ति पार्टीका ४ सांसदले समर्थन गरेका छन् ।
लुम्बिनी प्रदेशसभामा विपक्षमा माओवादी १०, नेकपा एस, राजमो र स्वतन्त्र १/१ गरी १३ सदस्य रहेका छन् ।
४ सांसद रहेको राप्रपाले के गर्ने टुंगो लगाएको छैन । विपक्षमा रहेकाहरूको समेत मत लिने गरी सत्ता साझेदार दलभित्र तयारी छ ।
८७ सांसद रहेको लुम्बिनी प्रदेशसभामा आवश्यक बहुमतको लागि ४४ सांसद संख्या चाहिन्छ ।
मुख्यमन्त्रीमा नियुक्त भएको ३० दिनभित्र विश्वासको मत लिने व्यवस्था अनुसार मङ्गलवार दिउँसो १ बजे लुम्बिनी प्रदेशसभामा आचार्यले विश्वासको मत लिने कार्यसूची रहेको प्रदेशसभा सचिव दुर्लभकुमार पुन मगरले जानकारी दिए ।
एमाले संसदीय दलको उपनेता भएको बेला आचार्य मुख्यमन्त्री बनेका थिए अहिले भने दलको नेता बनिसकेका छन् ।
पार्टीले उपनेतालाई मुख्यमन्त्री बनाएपछि दल नेता लीला गिरीले साउन ७ गते नै राजीनामा बुझाएका थिए ।
मुख्यमन्त्रीको सम्पर्क कार्यालय बुटवलमा एमाले पोलिटब्युरो सदस्य एवं लुम्बिनी प्रदेश इन्चार्ज पद्मा अर्यालसहितको एमाले संसदीय दलको बैठकमा गिरिले राजीनामा दिएको रिक्त दल नेतामा आचार्यलाई सर्वसम्मत रूपमा चयन गरिएको थियो ।
शंकर पोखरेल मुख्यमन्त्री भएका बेला पहिलो पटक मन्त्री बनेका आचार्यले आन्तरिक मामिला तथा कानूून मन्त्रालय सम्हालेका थिए ।
करिब एक महिना मात्र मन्त्री बनेका आचार्य दोस्रो पटक लीला गिरिको नेतृत्वमा खानेपानी तथा सहरी विकास मन्त्री बनेका थिए ।
दोस्रो कार्यकाल पनि लामो समय मन्त्री बन्न नपाएका आचार्य गत चैत्र २५ गते जोखबहादुर महराको नेतृत्वमा आन्तरिक मामिला तथा योजना मन्त्री बनेका थिए ।
यो आर्थिक वर्षको बजेट उनैले ल्याएका हुन् ।