हैदराबादमा साउथ फिल्म उद्योगका चर्चित जोडी विजय देवरकोंडा र रश्मिका मन्दाना को विवाहपछिको भव्य रिसेप्सन आज आयोजना हुँदैछ। कार्यक्रम शहरस्थित ताज कृष्णा मा हुँदैछ। गत फेब्रुअरी २६ मा उदयपुर मा सीमित पारिवारिक सदस्य र नजिकका साथीहरूको उपस्थितिमा विवाह गरेका यो जोडीले आज सहकर्मी, फिल्मकर्मी र विशिष्ट पाहुनाहरूका लागि विशेष समारोह राखेका हुन्। उनीहरूको विवाह आईटीसी ममेन्टोस उदयपुर मा सम्पन्न भएको थियो, जहाँ करिब २५० जना मात्र आमन्त्रित थिए।
आजको रिसेप्सनमा हिन्दी, तमिल, तेलुगु, मलयालम र कन्नड फिल्म क्षेत्रका चर्चित कलाकारहरूका साथै प्रभावशाली राजनीतिज्ञहरूको उपस्थिति रहने जनाइएको छ। उच्च पदस्थ पाहुनाहरूको सम्भावित आगमनलाई ध्यानमा राख्दै स्थानीय प्रशासनसँग समन्वय गरी कडा सुरक्षा व्यवस्था गरिएको छ। आयोजकका अनुसार वैध निमन्त्रणा पत्रबिना कसैलाई प्रवेश दिइने छैन। सीमित अतिथि सूची, कडा सुरक्षा जाँच र निजी सुरक्षाकर्मीका साथै अतिरिक्त सुरक्षा बल परिचालन गरिएको छ।
विजय देवरकोंडा र रश्मिका मन्दानाको विवाह दुई फरक सांस्कृतिक परम्परा अनुसार सम्पन्न भएको थियो। बिहान तेलुगु रीतिरिवाजअनुसार कार्यक्रम गरिएको थियो भने साँझ रश्मिकाको पुर्ख्यौली कोडवा परम्परा अनुसार वैवाहिक संस्कार सम्पन्न गरिएको थियो।
लामो समयदेखि प्रेम सम्बन्धको चर्चा चलिरहे पनि यो जोडीले विवाहलाई अन्तिम समयसम्म गोप्य राख्न सफल भएको थियो।