इरानमाथि अमेरिका र इजरायलले गरेको पछिल्लो सैन्य कारबाहीपछि त्यहाँका क्रिप्टोकरेन्सी एक्सचेन्जहरूबाट ठूलो परिमाणमा अमेरिकी डलर बराबरको डिजिटल सम्पत्ति बाहिरिएको प्रतिवेदन सार्वजनिक भएको छ। ब्लकचेन विश्लेषण संस्था Elliptic का अनुसार शनिबारदेखि सोमबारसम्म इरानी एक्सचेन्जहरूबाट करिब १ करोड ३ लाख डलर बराबरको डिजिटल सम्पत्ति निकासी भएको हो। आक्रमण सुरु भएको केही घण्टाभित्रै रकम बाहिरिने क्रम तीव्र बनेको बताइएको छ।
विशेषगरी इरानकै सबैभन्दा ठूलो क्रिप्टो एक्सचेन्ज Nobitex बाट हुने निकासी अघिल्लो दिनको तुलनामा आठ गुणाले बढेको इलिप्टिकले जनाएको छ। विश्लेषकहरूका अनुसार बढ्दो युद्ध जोखिमका कारण सर्वसाधारणले आफ्नो सम्पत्ति सुरक्षित स्थानमा सार्न खोजेको हुन सक्छ। यसलाई सम्भावित पूँजी पलायनको संकेतका रूपमा पनि हेरिएको छ। यद्यपि कतिपय अवस्थामा एक्सचेन्जहरूले सुरक्षात्मक उपायस्वरूप तरलता व्यवस्थापन गर्न खोज्दा पनि यस्तो असामान्य तथ्याङ्क देखिन सक्ने अनुमान गरिएको छ।
इरानमा अन्तर्राष्ट्रिय नाकाबन्दी र भू–राजनीतिक तनावबीच डिजिटल मुद्राको प्रयोग तीव्र रूपमा बढ्दै गएको छ। सन् २०२५ मा मात्रै ८ देखि ११ अर्ब डलर बराबरको क्रिप्टो कारोबार भएको अनुमान गरिएको छ। अन्तर्राष्ट्रिय समाचार संस्था Reuters ले युद्ध तथा संकटको समयमा डिजिटल सम्पत्तिको भूमिकाबारे यो घटनाले महत्वपूर्ण संकेत दिएको उल्लेख गरेको छ।