वासिङ्टन डीसी । संयुक्त राज्य अमेरिकाको विदेश मन्त्रालय ले सुरक्षा जोखिम बढेको भन्दै जोर्डन, बहराइन र इराक मा कार्यरत गैर–आवश्यक अमेरिकी सरकारी कर्मचारी तथा उनीहरूका परिवारलाई अनिवार्य रूपमा स्वदेश फर्किन निर्देशन दिएको छ। विदेश मन्त्रालयका अनुसार जोर्डन र बहराइनमा रहेका कर्मचारीहरू इरान बाट हुन सक्ने ड्रोन तथा मिसाइल आक्रमणको सम्भावित जोखिममा छन्। यससँगै व्यावसायिक उडानमा अवरोध आउन सक्ने तथा आतंकवादी आक्रमणको खतरा पनि औँल्याइएको छ। इराकको सन्दर्भमा मन्त्रालयले हिंसा, सशस्त्र झडप र अपहरणको जोखिम उच्च रहेको चेतावनी दिएको छ। त्यहाँको अस्थिर सुरक्षा अवस्थाका कारण अमेरिकी कूटनीतिक र सैन्य संरचना सम्भावित लक्ष्य बन्न सक्ने आकलन गरिएको छ। संयुक्त राज्य अमेरिका र इजरायल ले इरानविरुद्ध सैन्य अभियान सुरु गरेपछि यी तीन देशस्थित अमेरिकी दूतावासबाट गैर–आवश्यक कर्मचारी फिर्ता बोलाउने यो पहिलो निर्णय हो। अमेरिकी अधिकारीहरूका अनुसार इरानबाट सम्भावित प्रतिकारात्मक कदमका कारण क्षेत्रभर सुरक्षा जोखिम उल्लेखनीय रूपमा बढेको संकेत देखिएको छ।
साथै, व्यावसायिक उडानहरू प्रभावित भइरहेकाले केही अमेरिकी नागरिकलाई मध्यपूर्व क्षेत्र छाड्न कठिनाइ हुन सक्ने चेतावनी पनि दिइएको छ। मन्त्रालयले नागरिकहरूलाई अद्यावधिक सुरक्षा सूचनामा ध्यान दिन र आवश्यक परे सुरक्षित स्थानतर्फ सर्न आग्रह गरेको छ।
