संखुवासभाको मकालु गाउँपालिका–५ र २ जोड्ने बेलीब्रिज ओभरलोड ट्रकको भार धान्न नसकेर भाँचिएको छ। शनिबार बिहान करिब ९ बजे सिमेन्ट बोकेको ट्रक पुल भाँचिएसँगै अरुण नदीमा खसेको थियो।
ट्रकमा सवार ४० वर्षीय अर्जुन श्रेष्ठ गम्भीर घाइते भएका छन्। उक्त ट्रकले निर्माणाधीन कासुवा हाइड्रोपावरको सामग्री बोकेको थियो। पुल भाँचिएसँगै नुम–सेदुवा सडकखण्ड पूर्ण रूपमा अवरुद्ध भएको छ, जसले स्थानीय, पर्यटक र दैनिक सामग्री ढुवानी प्रभावित भएको छ।
नेपाल यातायात व्यवसायी महासंघका अध्यक्ष सरोज सिटौलाले क्षमताभन्दा बढी भार बोकेका सवारी साधनले सडक र पुलहरूको आयु घटाएको र जनधन जोखिममा परेको बताए। उनले भने, “२० टन क्षमता भएको गाडी ४० टनसम्म बोकेर हिँडिरहेको छ, जसले सडकको आयु घटाउँछ।”
विशेषगरी सीमा क्षेत्रबाट भित्रिने भार भएका गाडीहरूले पनि पुलहरूको सुरक्षा जोखिममा पारेको जनाइएको छ।