रवि लामिछाने हाल राष्ट्रिय स्वतन्त्र पार्टी का सभापति हुन् र नेपाली राजनीतिमा नयाँ पुस्ताको प्रतिनिधित्व गर्ने नेता मानिन्छन्। उनी चितवन २ बाट निर्वाचित सांसद हुन् र केही समयका लागि नेपालका उपप्रधानमन्त्री तथा गृहमन्त्रीको जिम्मेवारी पनि सम्हालेका थिए। छोटो समयमा नै राष्ट्रिय राजनीतिमा प्रभाव जमाउन सफल भएकाले उनी देशभर व्यापक चर्चा र बहसको विषय बनेका छन्।
रवि लामिछानेको जन्म ३० भदौ २०३१ मा भक्तपुर मा भएको हो। युवावस्थामा उनले रोजगारी र अध्ययनका लागि केही वर्ष संयुक्त राज्य अमेरिकामा पनि बिताए। नेपाल फर्केपछि उनले सञ्चार क्षेत्रमा काम सुरु गरे र टेलिभिजन पत्रकारितामार्फत लोकप्रियता कमाए। विशेषगरी उनले सञ्चालन गरेको कार्यक्रम सिधा कुरा जनता संग ले उनलाई राष्ट्रिय स्तरमा चिनायो। उक्त कार्यक्रममा उनले सर्वसाधारणका समस्या, भ्रष्टाचार, ठगी तथा सामाजिक मुद्दाहरूलाई उठाउने गर्थे। उनको स्पष्ट र आक्रामक प्रस्तुति शैलीले कार्यक्रम अत्यन्त लोकप्रिय बनायो र उनी जनतामाझ प्रभावशाली सञ्चारकर्मीका रूपमा स्थापित भए।
पत्रकारितामा लामो समय काम गरेपछि रवि लामिछानेले देशमा वास्तविक परिवर्तन ल्याउन प्रत्यक्ष राजनीतिमा प्रवेश गर्ने निर्णय गरे। त्यसअनुसार उनले २०७९ सालमा राष्ट्रिय स्वतन्त्र पार्टी स्थापना गरे, जसको एजेन्डा भ्रष्टाचार अन्त्य गर्ने, सुशासन कायम गर्ने र नयाँ राजनीतिक संस्कृतिको विकास गर्ने थियो। नयाँ पार्टी भए पनि २०७९ को प्रतिनिधि सभा निर्वाचनमा पार्टीले उल्लेखनीय सफलता हासिल गर्यो र रवि लामिछाने स्वयं संसदमा निर्वाचित भए। त्यसपछि उनको राजनीतिक यात्रा नेपालमा उदाउँदै गरेको नयाँ राजनीतिक शक्तिको प्रतीकका रूपमा हेरिन थालियो।