झापा/काठमाडौँ: आगामी चैत २१ को निर्वाचन नजिकिएसँगै झापा निर्वाचन क्षेत्र नम्बर ५ मा राजनीतिक सरगर्मी उत्कर्षमा पुगेको छ। नेकपा एमालेका अध्यक्ष केपी शर्मा ओलीले शुक्रबार दमकमा आयोजित एक कार्यक्रममा बोल्दै निष्पक्ष निर्वाचनको वातावरण बनाउन सरकार असफल भएको आरोप लगाउनुभएको छ। पूर्वप्रधानमन्त्री ओलीले एमाले चुनावबाट नभाग्ने र मुलुकको संकट समाधानका लागि आफ्नो पार्टीले नै जित्नुपर्ने जिकिर गर्दै युवाहरूलाई बाह्य भ्रममा नपर्न आग्रह गर्नुभयो।
यता, ओलीकै निर्वाचन क्षेत्रमा चुनौती दिइरहनुभएका रास्वपा नेता बालेन्द्र शाह (बालेन) ले आफ्नो चुनावी ‘बाचापत्र’ सार्वजनिक गर्दै शिक्षा र स्वास्थ्यमा आमूल परिवर्तनको एजेन्डा अघि सार्नुभएको छ। काठमाडौँमा सफल भएको ‘शिक्षामा सीप’ कार्यक्रमलाई झापामा विस्तार गर्ने र विद्यालय छाड्ने दरलाई शून्यमा झार्ने उहाँको मुख्य लक्ष्य छ। स्थानीय मतदाता माझ ‘परिवर्तनको लहर’ बढिरहेका बेला बालेनले सामाजिक सद्भावमा पनि जोड दिनुभएको छ। उहाँले आज राष्ट्रिय मगर दिवसको शुभकामना दिनुका साथै बिहीबार साँझ मुस्लिम समुदायसँग इफ्तारमा सहभागी भएर सांस्कृतिक एकताको सन्देश दिनुभएको थियो।
निर्वाचनलाई भयरहित बनाउन कोशी प्रदेशमा सुरक्षा व्यवस्था निकै कडा पारिएको छ। प्रदेश प्रहरी कार्यालयका अनुसार १२ हजार नेपाल प्रहरी र २३ हजार निर्वाचन प्रहरीसहित ५० हजारभन्दा बढी सुरक्षाकर्मी परिचालन भइसकेका छन्। ३५ लाखभन्दा बढी मतदाता रहेको यस प्रदेशका संवेदनशील क्षेत्रमा विशेष निगरानी बढाइएको छ। एमालेको वर्चस्व जोगाउने ओलीको रणनीति र नयाँ नेतृत्वको खोजीमा रहेका मतदाताको बालेनप्रतिको आकर्षणले झापा-५ को प्रतिस्पर्धा यसपटक ऐतिहासिक हुने देखिएको छ।