सिन्धुली, गत वर्षको असोज दोस्रो साता आएको बाढीपहिराले क्षतिग्रस्त बीपी राजमार्ग (धुलिखेल–सिन्धुली–बर्दिबास) अन्तर्गतको कटुञ्जेबेशी, मंगलटार र नेपालथोक सडकखण्ड हाल डाइभर्सन बनाएर सञ्चालनमा ल्याइएको छ।
बाढीले मुख्य सडक नै बगाएपछि यस वर्ष खोलाको बगरमा अस्थायी सडक निर्माण गरी सवारी आवतजावत मिलाइएको हो।
खोलाबाटै बनाइएको अस्थायी सडकमा यात्रा गर्दा जोखिम हुनुका साथै यात्रुहरूले क्षतिग्रस्त खण्ड पार गर्न पहिलेभन्दा धेरै समय खर्चनुपर्ने बाध्यता छ।
धुलाम्य सडकमा धूलो नियन्त्रणका लागि पानी हाल्दा बाटो चिप्लो हुने भएकाले सवारी साधन दुर्घटना हुने सम्भावना समेत उत्तिकै बढेको छ।
डिभिजन सडक कार्यालय भक्तपुरका अनुसार बिपी राजमार्गका विभिन्न खण्डहरूको स्थायी पुनर्निर्माणका लागि करिब ९ अर्ब ६६ करोड रुपैयाँ खर्च हुने अनुमान गरिएको छ।
कार्यालयले भकुण्डेदेखि नेपालथोकसम्मको क्षतिग्रस्त खण्डहरूको विस्तृत अध्ययन गरी उक्त रकम लाग्ने जनाए पनि हालसम्म आवश्यक स्रोत (बजेट) भने सुनिश्चित हुन सकेको छैन।
यस राजमार्गअन्तर्गत काभ्रेपलाञ्चोकको नमोबुद्धस्थित चौकीडाँडादेखि रोशी गाउँपालिकाको कालढुङ्गासम्मको १२ किलोमिटर सडकखण्डमध्ये ८ किलोमिटर सडक पूर्ण रूपमा क्षतिग्रस्त भएको छ।
जापान सरकारको अनुदान सहयोगमा आर्थिक वर्ष २०५३/५४ देखि निर्माण शुरु गरिएको १६० किलोमिटर लामो यो राजमार्ग खण्ड(खण्ड गरी निर्माण गरिएको थियो।
झण्डै २० वर्ष लगाएर निर्माण सम्पन्न भएपछि २०७२ असार १८ गते जापान सरकारले औपचारिक रूपमा यसलाई नेपाल सरकारलाई हस्तान्तरण गरेको थियो।