काठमाण्डू, नेपालमा भारतीय एक सय रुपियाँभन्दा ठूला दरका नोट पनि चलनचल्तीमा ल्याउन भारतीय रिजर्भ बैङ्कले अनुमति दिएको छ ।
सन् २०१६ नोभेम्बरमा भारतले ठूला नोटमा नोटबन्दी गरेसँगै नेपालमा पनि एक सय रुपियाँभन्दा ठूला नोट प्रतिबन्ध लागेको थियो ।
भारतीय रिजर्भ बैङ्कले त्यहाँको राजपत्रमा सूचना प्रकाशन गर्दै नेपाल र भुटानमा एकभन्दा ठूला दरका भारतीय नोट प्रचलनमा ल्याउन पाउने सूचित गरेको हो ।
सूचना अनुसार अब नेपाली तथा भारतीय नागरिक नेपाल–भारत आवतजावत गर्दा २५ हजार भारुसम्म नगदै एक सयभन्दा ठूला नोट ल्याउन लैजान पाउने छन् ।
यसले गर्दा भारतीय पर्यटक, भारतमा रहेका नेपालीले नेपाल आउँदा २५ हजार रुपियाँसम्म ठुला भारु नोट नेपाल ल्याई प्रचलनमा ल्याउन सक्ने छन् ।
त्यस्तै नेपालमा रहेका भारतीय नागरिक, भारतमा अध्ययन तथा उपचारका लागि जाने नेपालीले पनि यस्तो नगद साथै लैजान पाउने छन् ।
भारतमा राजपत्रमा यो सूचना आएसँगै अब नेपाल राष्ट्र बैङ्कले भारतीय ठूला नोट प्रचलनमा ल्याइएको औपचारिक जानकारी गराएपछि कार्यान्वयनमा जाने नेपाल राष्ट्र बैङ्कका प्रवक्ता तथा कार्यकारी निर्देशक गुरुप्रसाद पौडेलले जानकारी दिए ।
“भारतको राजपत्रमा यस्तो सूचना आइसकेको छ, यसलाई नेपालमा कार्यान्वयन गराउन राष्ट्र बैङ्कले औपचारिक रूपमा सूचना निकाल्छ,” उनले भने ।
भारतले ठूला दरका नोट प्रचलन अनुमति दिए पनि विगतमा नोटबन्दीमा परेका ठूला नोट भने चल्तीमा आउने छैनन् ।
सन् २०१६ को नोटबन्दीका कारण नेपालको औपचारिक वित्तीय प्रणालीमा रहेको करिब आठ करोड रुपियाँ बराबरको भारु नोट चलाउन भने नपाइने उहाँले बताए ।
“भारतको यो सूचनाले नोटबन्दीमा परेका नोट चलाउन मिल्ने भनेको होइन, सर्वसाधारणले यो बुझ्न जरुरी छ,” उनले भने, “कतिपय नागरिकले पुराना नोट राखेका हुन सक्छन् ।
तर, त्यो चलाउन मिल्दैन ।” यो अवस्थाले विदेशी मुद्रा व्यक्तिले सञ्चित गर्नु हुँदैन भन्ने पाठ सिक्न जरुरी रहेको उनले बताए ।