काठमाण्डू, सेयरबजारको वृद्धि आजपनि जारी रहेको छ । यससँगै यो साताभर पाचै दिन सेयरबजार बढ्यो ।
साताको अन्तिम कारोबार नेपाल स्टक एक्सचेञ्च (नेप्से) परिसूचक ०.३९ प्रतिशत अर्थात १०.४३ अंकले बढेर २ हजार ६७६.०३ विन्दूमा पुगेको छ ।
यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५२ प्रतिशतले बढेर ४६१.६१ विन्दूमा पुगेको छ ।
यो दिन नेप्सेमा सूचीकृत मध्ये ३३३ वटा स्क्रिप्टको १ करोड ४६ लाख ९३ हजार ८०७ कित्ता सेयर ६ अर्ब ६६ करोड २३ लाख रुपैयाँभन्दा बढीको कारोबार भएको छ ।
आजको कारोबार अघिल्लो दिनको तुलनामा केही कम हो । अघिल्लो दिन भने ६ अर्ब ६९ करोड रुपैयाँभन्दा बढीको कारोबार भएको थियो ।
यो दिन नेप्सेमा सूचीकृत १३ वटा समूहमध्ये ८ वटामा हरियाली छायो भने ५ वटामा रातो पोतियो ।
आज बैंकिङ समूह सर्वाधिक अर्थात १.४७ प्रतिशतले बढ्यो । यस्तै विकास बैंक समूह ०.१७, होटल ०.३३, हाईड्रो ०.०१, लगानी ०.७२, जीवन बीमा ०.१४, म्युचुअल फण्ड ०.७८ र निर्जीवन बीमा ०.०८ प्रतिशतले बढ्यो ।
फाइनान्स समूह आज सर्वाधिक घट्यो । यो समूह आज ०.३८ प्रतिशतले घट्यो ।
यस्तै उत्पादन तथा प्रशोधन ०.२६, लघुवित्त ०.३५, अन्य ०.०५ र व्यापार समूह ०.१४ प्रतिशतले घट्यो ।
धेरै कारोबार गर्ने कम्पनीहरु
यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको ४० करोड १७ लाख बढीको सेयर कारोबार भयो ।
यस्तै ङादी ग्रुप पावरको १६ करोड ३६ लाख, हिमालयन रि इन्स्योरेन्सको १५ करोड ९७ लाख, सिईडिबी होल्डिङको १५ करोड ७८ लाख र युनाइटेड मोदी हाईड्रोको १४ करोड ५० लाख बढीको सेयर कारोबार भयो ।
धरै कमाउने र गुमाउने कम्पनीहरु
आज नेप्सेमा कारोबार भएका ५ वटा कम्पनीको सेयरमूल्यमा अपर सर्किट लाग्यो । आज सागर डिष्टिलरी, झापा इनर्जी, श्रीनगर एग्रोटेक,स्वस्तिक लघुवित्त र एनआरएन इन्फ्रास्ट्रक्चरको सेयरमूल्यमा अपर सर्किट लाग्यो ।
यस्तै आज हिमाल दोलखा हाईड्रोको सेयरमूल्य ५.८१ प्रतिशत, ओम मेगा श्री फर्मास्युटिकल्सको ५.७७ र गणपति लघुवित्तको सेयरमूल्य ५.६० प्रतिशतले बढ्यो ।
यो दिन हिमस्टार उर्जाको सेयरमूल्य सर्वाधिक अर्थात ७.७८ प्रतिशतले घट्यो ।
यस्तै फर्स्ट माईक्रोफाइनान्स लघुवित्तको सेयरमूल्य ७.७८ प्रतिशत र महुली लघुवित्तको सेयरमूल्य ४.१६ प्रतिशतले घट्यो ।
