काठमाडौँ, नेपाल राष्ट्र बैंकले आर्थिक वर्ष २०८०/८१ को नौ महिनासम्ममा चालूू खर्च रु.६४४ अर्ब ३ करोड भएको जनाएको छ ।
आर्थिक वर्ष २०८०/८१ को मौद्रिक नीतिको तेस्रो त्रैमासिक समीक्षा गर्दै राष्ट्र बैंकले पूूँजीगत खर्च रु.९७ अर्ब ३८ करोड र वित्तीय व्यवस्था खर्च रु.१६७ अर्ब ९९ करोड भएको जनाएको छ ।
सो अवधिमा नेपाल सरकारको कुल खर्च रु.९०९ अर्ब ३९ करोड भएको महालेखा नियन्त्रक कार्यालयलाई उद्धृत गर्दै राष्ट्र बैंकले जनाएको छ ।
यस अवधिमा सरकारको कुल राजस्व परिचालन ( प्रदेश सरकार तथा स्थानीय सरकारमा बाँडफाँट हुने रकमसमेत ) रु.७४८ अर्ब ४ करोड भएको छ ।
यस्तै समीक्षा अवधिमा सरकारी खर्च गत वर्षको सोही अवधिको तुलनामा ३.६ प्रतिशतले घटेको छ भने राजस्व परिचालन ९.४ प्रतिशतले बढेको छ ।
यस्तै सार्वजनिक ऋण व्यवस्थापन कार्यालयका अनुसार आर्थिक वर्ष २०८०/८१ को नौ महिनासम्ममा सरकारले रु.१७६ अर्ब आन्तरिक र रु.६२ अर्ब ९४ करोड बाह्य गरी कुल रु.२३८ अर्ब ९४ करोड ऋण परिचालन गरेको बैंकको त्रैमासिक समीक्षामा उल्लेख छ।