अर्घाखाँचीलाई देवभूमिको रूपमा परिभाषित गर्नुपर्छ: प्रधानमन्त्री ओली

अर्घाखाँची, प्रधानमन्त्री केपी ओलीले अर्घाखाँचीलाई ध्यान, ज्ञान र देवभूमिको रूपमा परिभाषित गर्दै यही भूमि विश्वव्यापी ज्ञानको सुरुवात गर्ने ठाउँ भएको बताएका छन् ।

अर्घाखाँचीमा आयोजित ‘पाणिनी तपोभूमि सम्मेलन’को उद्घाटन समारोहलाई सम्बोधन गर्दै प्रधानमन्त्री ओलीले पाणिनिको जन्मस्थान अर्घाखाँची भएकोमा कुनै शङ्का नरहेको प्रष्ट पारेका हुन् ।

‘‘यो भूमि पावन छ, पुण्य छ, देवभूमि हो । यहाँबाटै ज्ञानको सुरुवात भयो,’’ प्रधानमन्त्री ओलीले भने, ‘‘विश्वका व्याकरणका पिता पाणिनि यही भूमिमा जन्मनु भएको हो । अरू सबै व्याकरणहरूले पाणिनिको सूत्रलाई आधार मानेका छन् ।’’

प्रधानमन्त्री ओलीले पाणिनिको योगदान असाधारण रहेको उल्लेख गर्दै अष्टाध्यायीमार्फत संस्कृत व्याकरणको तीन हजार नौ सय ५९ सूत्र निर्माण गरिएको र ती सूत्रहरू आजको आधुनिक प्रविधि, विशेषगरी कृत्रिम बौद्धिकता (एआई) विकासमा समेत प्रयोग भरहेको बताए ।

उनले भने, ‘‘पाणिनिको व्याकरणपछि भाषा सरल बन्दै गयो, छन्दको सुरुवातसँगै सङ्गीत र लयको विकास भयो ।’’

प्रधानमन्त्री ओलीले पाणिनिले मात्र नभई शिव, सिङ्ग ऋषि, पतञ्जली र अन्य महर्षिहरूको तप, साधना, योग, आयुर्वेद र ज्ञान साधनाको केन्द्र भएको यस भूमिलाई समूचित प्रचारप्रसार गरी धार्मिक तथा पर्यटकीय स्थलको रूपमा विकास गर्ने जिम्मा सरकारले लिने स्पष्ट पारे ।

नेपाल सरकारले यस क्षेत्रको विकासका लागि ध्यान दिएको स्पष्ट पार्नुभयो । धार्मिक र पर्यटकीय स्थलको रूपमा विकास गर्न जोड दिने बताए ।

प्रधानमन्त्री ओलीले पाणिनिको जन्म पाकिस्तानमा भएको भन्ने भ्रम मात्रै भएको बताएका छन् ।

उनले भने, ‘‘ऋषिहरू ध्यान र तपस्याका लागि उपयुक्त भूमि खोज्थे, व्याकरण बनाउन सजिलो ठाउँ हेरेर गएका होइनन् । शिवका डमरुको ध्वनि सुनेर व्याकरण सृजना गर्ने पाणिनिको साधना यहीँ भएको हो ।’’