एजेन्सी, इन्डियन प्रिमियर लिग (आइपीएल) मा लखनउ सुपर जायन्टले दोस्रो जीत दर्ता गरेको दिन मुम्बई इन्डियन्सले भने तेस्रो हार व्यहोरेको छ ।
शुक्रबार लखनउमा भएको खेलमा मुम्बईलाई १२ रनले हराउँदै लखनउले दोस्रो जीत हात पारेको हो ।
लखनउले दिएको २ सय ४ रनको लक्ष्य पछ्याएको मुम्बईले निर्धारित २० ओभरमा ५ विकेटको क्षतिमा १ सय ९१ रन मात्र बनाउन सक्यो ।
सूर्यकुमार यादवले सर्वाधिक ६७ रनको योगदान दिएपनि टोलीको हार टार्न सकेनन् । उनले ४३ बलमा ९ चौका र १ छक्का प्रहार गरे ।
नमन धिरले ४६ रन थपे । कप्तान हार्दिक पाण्ड्या २८ र तिलक वर्मा २५ रनमा पेभेलियन फर्के ।
त्यसअघि मुम्बईले टस जितेर फिल्डिङ रोजेपछि ब्याटिङ गरेको लखउनले निर्धारित २० ओभरमा ८ विकेटको क्षतिमा २ सय ३ रनको योगफल तयार पारेको थियो ।
ओपनर मिचेल मार्स ६० रन बनाउँदा कट एण्ड बोल्ड हुन पुगे । अर्का ओपनर एडेन मक्रम ५३ रन बनाउँदा हार्दिक पाण्ड्याको बलमा क्याच आउट भए ।
हार्दिकले १२ रन बनाएका निकोलस पुरनलाई १२ रन बनाउँदा क्याच आउट गराए । आयुष बाडोनी २९ र डेविड मिलर २७ रन बनाउँदा पेभेलियन फर्के ।
मुम्बईका हार्दिक पाण्ड्याले ५ विकेट लिएपनि टोलीको हार टार्न सकेनन् । उनले आफ्नो स्पेलमा ३६ रन खर्चे ।
जितसँगै २ खेलमा जित र २ खेलमा हार भोगेको लखनउ ४ अंकमा तालिकाको छैटौँ स्थानमा छ ।
समान खेलबाट १ खेलमा जित र ३ खेलमा हार भोगेको मुम्बई २ अंकमा सातौँ स्थानमा छ ।
आइपीएलमा आज शनिबार दुई खेल हुँदैछन् । दिनको पहिलो खेलमा चेन्नइ सुपर किंग्स र देल्ली क्यापिटल्स भिड्नेछन् ।
सो खेल दिउँसो पौने ४ बजे सुरु हुनेछ । शनिबार कै दोस्रो खेलमा पञ्जाब किंग्स र राजस्थान रोयल्स खेल्नेछन् । यो भने राति पौने आठ बजे सुरु हुनेछ ।
