विराटनगर, कोशी प्रदेशका मुख्यमन्त्री हिक्मत कार्कीले आज विश्वासको मत लिने भएका छन् ।
उनले आज बिहान ११ बजे बस्ने प्रदेश सभाको बैठकमा मुख्यमन्त्री कार्कीले विश्वासको मत लिने भएका हुन् ।
कोशी प्रदेश सभामा ९३ सांसदमध्ये बहुमत पुर्याउन ४७ सांसद आवश्यक पर्छ ।
नेकपा एमाले र नेकपा माओवादी केन्द्र दुवै दलका सांसदले उनलाई विश्वासको मत दिने देखिएको छ भने जसपा नेपालकी सांसद निर्मला लिम्बूले पनि विश्वासको मत दिने बताएकी छन् ।
कांग्रेसले भने प्रदेशसभाको बैठक बहिष्कार गर्ने जनाएको छ । त्यसबारे छलफल गर्न आज बिहान कांंग्रेस प्रदेशसभा संसदीय दलको बैठक बस्दैछ ।
आइतबार कार्यसूची तयार गर्न बसेको बैठकमा कांग्रेसले कोशी सरकारबारे अदालतमा मुद्दा विचाराधीन रहेकाले मुख्यमन्त्रीले तत्काल विश्वासको मत लिन नहुने निष्कर्ष निकालेको थियो ।
राप्रपाले पनि मुख्यमन्त्रीलाई विश्वासको मत दिने या नदिने भन्ने विषयमा निर्णय गरिसकेको छैन ।
कार्की यही २७ वैशाखमा तेस्रोपटक मुख्यमन्त्री बनेका हुन् ।
मुख्यमन्त्री नियुक्ति प्रक्रियामा असन्तुष्टि जनाउँदै तात्कालीन मुख्यमन्त्री केदार कार्कीले सर्वोच्च अदालतमा रिट दायर गरेका छन् ।
सो रिटमा अदालतले निर्णय दिइसकेको छैन् ।
