रसुवा, भोटेकोशी नदीमा आएको भीषण बाढीका कारण रसुवागढी हाइड्रोपावरमा ठूलो क्षति पुगेको छ।
बाढीले हाइड्रोपावरको ड्याम र कर्मचारी बस्ने क्याम्प बगाएपछि त्यहाँ कार्यरत कर्मचारीहरू भागेर नजिकैको जङ्गलमा आश्रय लिइरहेका छन्।
रसुवागढी जलविद्युत केन्द्रका प्रशासन प्रमुख टिकनाथ पौडेलले दिएको जानकारीअनुसार हाइड्रोपावरमा ठूलो क्षति भएको अनुमान छ।
पौडेलले भने, ‘हाम्रा गाडीहरू पनि बगेका छन्। साथीहरू ‘अडिट टु’ भनिने जङ्गल क्षेत्रमा गएर बसिरहनुभएको छ।”
आयोजनामा दुई महिलासहित करिब २५(३० जना कर्मचारीहरू रहेको र उनीहरूलाई उद्धार गर्नका लागि हेलिकप्टर पठाउने तयारी भइरहेको पौडेलले बताए।
हाइड्रोपावरको विद्युत् उत्पादन गृह भने सुरक्षित रहेको उनले जानकारी दिए।
